قاہرہ: اسماعیلی برادری کے روحانی پیشوا، پرنس کریم آغا خان کی تدفین مصر کے شہر اسوان میں کر دی گئی۔ غیر ملکی خبر رساں ایجنسی کے مطابق، پرنس کریم آغا خان کا خاندان اسوان پہنچنے پر اسوان کے گورنر میجر جنرل اسماعیل کمال نے ان کا استقبال کیا۔
گورنر اسوان نے کہا کہ پرنس کریم آغا خان نے اپنی وصیت میں یہ ذکر کیا تھا کہ ان کی تدفین اسوان میں ان کے دادا سلطان محمد شاہ اور دادی ام حبیبہ کے قریب کی جائے۔
یاد رہے کہ پرنس کریم آغا خان کا انتقال 4 فروری کو 88 برس کی عمر میں پرتگال کے شہر لزبن میں ہوا تھا۔ اس سے قبل لزبن میں ان کی آخری رسومات ادا کی گئی تھیں۔ پاکستانی وزیر خزانہ محمد اورنگ زیب نے پرنس کریم آغا خان کی نماز جنازہ میں شرکت کی اور اس موقع پر اسماعیلی کمیونٹی کے 50ویں امام، پرنس رحیم آغا خان سے ملاقات بھی کی۔ وزیر خزانہ نے صدر، وزیر اعظم اور پاکستانی عوام کی جانب سے تعزیت کا اظہار کیا۔
پرنس کریم آغا خان کی خدمات اور رہنمائی اسماعیلی برادری کے لیے ہمیشہ یاد رکھی جائے گی۔ ان کا انتقال عالمی سطح پر ایک بڑے سانحے کے طور پر محسوس کیا گیا ہے۔
