اسلام آباد: سپریم کورٹ میں 8 نئے ججز کی تعیناتی کے معاملے پر جوڈیشل کمیشن کا اجلاس آج ہوگا۔ اجلاس کی صدارت چیف جسٹس پاکستان یحییٰ آفریدی کریں گے، جو دوپہر 2 بجے سپریم کورٹ کے کانفرنس روم میں منعقد ہوگا۔ اجلاس میں سپریم کورٹ کے 8 ججز کی تعیناتیوں پر غور کیا جائے گا۔
جوڈیشل کمیشن نے سپریم کورٹ میں 8 نئے ججز کی تعیناتی کے لیے پانچوں ہائی کورٹس کے 5 سینئر ججز کے نام طلب کیے ہیں۔ اس حوالے سے مختلف قانونی حلقوں کی جانب سے مختلف آراء سامنے آرہی ہیں۔ علاوہ ازیں، سپریم کورٹ کے 4 ججز اور ممبر جوڈیشل کمیشن سینیٹر علی ظفر نے اجلاس ملتوی کرنے کی درخواست کے لیے چیف جسٹس کو خط بھی لکھا ہے۔
دوسری جانب آل پاکستان وکلاء ایکشن کمیٹی نے آج شاہراہ دستور پر احتجاج کا اعلان کیا ہے، جس کے خلاف سپریم کورٹ بار ایسوسی ایشن، پاکستان بار کونسل، پنجاب بار کونسل، کے پی کے بار کونسل، بلوچستان اور سندھ ہائی کورٹس بار ایسوسی ایشن نے ہڑتال کی کال کو مسترد کر دیا ہے۔
بار کونسل ایسوسی ایشن کی جانب سے جاری کردہ اعلامیہ میں کہا گیا ہے کہ وہ عدلیہ کی آزادی کے ساتھ کھڑے ہیں اور جوڈیشل کمیشن کے اجلاس کے موقع پر انتشاری لوگوں کی کال کو یکسر مسترد کرتے ہیں۔ اعلامیہ میں یہ بھی کہا گیا کہ ہڑتال کی کال کا فیصلہ صرف اور صرف منتخب قانونی باڈیز کر سکتی ہیں، اور یہ ہڑتال ناکام ہو گی، جیسا کہ ماضی میں ہوا تھا۔
