اسلام آباد: قومی اسمبلی اور وفاقی کابینہ تحلیل ہوتے ہی اتحادی حکومت کا راج ختم ہوگیا۔ صدرمملکت عارف علوی نے وزیراعظم کی حکومت تحلیل کرنے کی سمری پر فوری دستخط کر دیئے۔
قومی اسمبلی کی تحلیل کے ساتھ ہی وفاقی کابینہ بھی تحلیل ہوگئی۔
صدر مملکت ڈاکٹر عارف علوی نے قومی اسمبلی تحلیل کر دی
— The President of Pakistan (@PresOfPakistan) August 9, 2023
صدر مملکت نے قومی اسمبلی کی تحلیل وزیر ِ اعظم کی ایڈوائس پر آئین کے آرٹیکل 58 ایک کے تحت کی pic.twitter.com/B7kGkMWLEh
یاد رہے کہ وزیراعظم شہباز شریف نے قومی اسمبلی توڑنے کی سمری صدر مملکت عارف علوی کو بھجوائی گئی تھی، جس میں صدر سے عبوری حکومت تشکیل دینے کی بھی درخواست کی گئی تھی۔
نگران وزیراعظم کا نام آج فائنل ہونے کا امکان ہے۔وزیراعظم شہباز شریف نگراں وزیراعظم کی تعیناتی تک وزیراعظم رہیں گے، وزیراعظم شہباز شریف نگراں وزیراعظم کے تقرر کے لیے اپوزیشن لیڈر راجہ ریاض سے آج ملیں گے۔ وزیر اعظم شہباز شریف نے کہا کہ کہ آئین کی رو سے ہمارے پاس مشاورت کیلئے تین دن ہیں۔
نگراں وزیر اعظم کے لیے سابق سیکرٹری خارجہ جلیل عباس جیلانی مضبوط امیدوار جبکہ عبدالحفیظ شیخ ،شاہد خاقان عباسی بھی دوڑ میں شامل ہیں۔ آصف زرداری نے جلیل عباس جیلانی کانام نواز شریف کے سامنے رکھا جس پر قائد مسلم لیگ ن نے کوئی اعتراض نہیں کیا۔
واضح رہے کہ پارلیمانی کمیٹی کے نگراں وزیراعظم کا نام فائنل نہ کرنے پر معاملہ الیکشن کمیشن کے پاس چلا جائے گا، الیکشن کمیشن دیے گئے ناموں میں سے دو دن کے اندر نگراں وزیراعظم کا اعلان کر دے گا۔
