لاہور : پاکستان کے نوجوا ن کوہ پیما شہروز کاشف نے دنیا کی 14 بلند چوٹیاں سر کرنے کا اعزاز حاصل کر لیا، وہ 8 ہزار میٹر سے بلند تمام 14 چوٹیاں سر کرنے والے کم عمر ترین پاکستانی بن گئے ہیں۔
’براڈ بوائے‘ کے نام سے مشہور شہروز کاشف آج صبح شیشاپنگما کی چوٹی پر پہنچ گئے۔
22 سالہ شہروز کاشف نے یہ کارنامہ آج 8027 میٹر بلند شیشاپنگما کی چوٹی سر کرتے ہوئے انجام دیا۔وہ سرباز خان کے بعد دوسرے پاکستانی ہیں جنہوں نے تمام 14 بلند ترین چوٹیاں سر کی ہوں۔
سرباز نے گزشتہ ہفتے شیشا پنگما سر کرکے یہ کارنامہ انجام دینے والے پہلے پاکستانی ماونٹینیئر بننے کا اعزاز حاصل کیا تھا۔وہ دنیا کی 14 بلند ترین چوٹیاں سر کرنے والے پہلے پاکستانی بن گئے تھے۔
شہروز کاشف کا ایٹ تھوزنڈر سر کرنے کا سفر 2019 میں شروع ہوا، جب انہوں نے صرف 17 سال کی عمر میں 8047 میٹر بلند براڈ پیک کو سر کیا۔
شہروز کاشف نے اس کامیابی کے بعد کہا کہ دنیا کی 14بلند ترین چوٹیاں سر کرنے کی کامیابی پر اللہ تعالیٰ کا شکر گزار ہوں،ان کا کہنا تھا کہ یہ سب کچھ حاصل کرنا ان کیلئے آسان نہیں تھا، میرے لئے یہ کسی معجزے سے کم نہیں۔
