اسلام آباد :وفاقی وزیر خزانہ محمد اورنگزیب کاکہنا تھا کہ ٹیکس کی بنیاد وسیع کرنے کیلئے تاجر دوست سکیم کو کامیاب بنائیں گے۔
وفاقی وزیر خزانہ و محصولات محمد اورنگزیب نے وفاقی ریونیو بورڈ (ایف بی آر) ہیڈکوارٹرز کا دورہ کیا اور ٹیکس سے متعلق مختلف اقدامات کا جائزہ لینے کے لیے اجلاس کی صدارت کی۔اجلاس میں چیئرمین ایف بی آر ملک امجد زبیر ٹوانہ اور بورڈ کے اراکین شریک ہوئے۔اجلاس میں تاجر دوست سکیم، انفارمیشن ٹیکنالوجی کے مختلف منصوبوں، ٹیکس فراڈ اور جعلی انوائسز سے متعلق امور پر بات چیت کی گئی۔
تاجر دوست سکیم کے حوالے سے وزیر خزانہ نے کہا کہ یہ سکیم چھوٹے تاجروں کو ٹیکس نیٹ میں لانے کی غرض سے شروع کی گئی ہے اور حکومت ٹیکس کی بنیاد وسیع کرنے کے لیے اس سکیم کو کامیاب بنانے کے لیے پر عزم ہے۔
انہوں نے ٹیکس فراڈ اور جعلی انوائسز کے واقعات کا پتا لگانے اور دھوکا دہی سے چوری کیے گئے سیلز ٹیکس کی وصولی یقینی بنانے کے لیے ایک مؤثر طریقہ کار وضع کرنے کی ضرورت پر بھی زور دیا۔اجلاس میں محصولات جمع کرنے کی کوششوں اور ایف بی آر کی ڈیجیٹلائزیشن سمیت دیگر امور پر بھی تبادلہ خیال کیا گیا۔