دبئی: انٹرنیشنل کرکٹ کونسل (آئی سی سی) چیمپئنز ٹرافی کے فائنل میں نیوزی لینڈ نے بھارت کو جیت کے لیے 252 رنز کا ہدف دیا ہے۔
دبئی کرکٹ اسٹیڈیم میں کھیلے جانے والے میچ میں نیوزی لینڈ نے ٹاس جیت کر پہلے بیٹنگ کا فیصلہ کیا۔ کیوی اوپنرز نے ٹیم کو 57 رنز کا مستحکم آغاز فراہم کیا، تاہم 23 گیندوں پر 15 رنز بنانے والے ول ینگ ورون چکرورتی کی گیند پر ایل بی ڈبلیو ہو گئے۔
69 کے مجموعی اسکور پر رچن روندرا 37 رنز بنا کر کلدیپ یادو کی گیند پر کلین بولڈ ہو گئے، جب کہ 75 کے مجموعے پر کپتان کین ولیمسن 11 رنز بنا کر کیچ تھما بیٹھے۔
نیوزی لینڈ کی چوتھی وکٹ 108 کے مجموعے پر گری جب ٹام لیتھم 14 رنز بنا کر روندرا جدیجا کی گیند پر ایل بی ڈبلیو ہو گئے۔ 165 کے اسکور پر گلین فلپس 34 رنز بنا کر ورون چکرورتی کا شکار بنے۔
میچ سے قبل کیوی کپتان مچل سینٹنر نے کہا کہ ان کی ٹیم فائنل کے لیے مکمل تیار ہے اور وہ بڑا اسکور کرنے کی کوشش کرے گی۔ انہوں نے بتایا کہ میٹ ہینری انجری کے باعث ٹیم سے باہر ہو گئے ہیں، جن کی جگہ نیتھن اسمتھ کو شامل کیا گیا ہے۔
بھارتی کپتان روہت شرما نے کہا کہ وہ بعد میں بیٹنگ کرنے کے فیصلے سے مطمئن ہیں اور ان کی ٹیم کی توجہ نیوزی لینڈ کو کم سے کم اسکور تک محدود کرنے پر ہے۔
نیوزی لینڈ: ول ینگ، رچن روندرا، کین ولیمسن، ڈیرل مچل، ٹام لیتھم، گلین فلپس، مائیکل بریس ویل، مچل سینٹنر (کپتان)، کیلے جیمیسن، نیتھن اسمتھ اور ول اورورکی۔
بھارت: روہت شرما (کپتان)، شبمن گل، ویرات کوہلی، شیریاس ائیر، اکسر پٹیل، کے ایل راہول، ہردک پانڈیا، روندرا جدیجا، کلدیپ یادو، محمد شامی اور ورون چکرورتی۔
ون ڈے کرکٹ کے اعداد و شمار کے مطابق بھارت اور نیوزی لینڈ کے درمیان اب تک 119 میچز کھیلے جا چکے ہیں، جن میں بھارت نے 61 جبکہ نیوزی لینڈ نے 50 میچز جیتے ہیں، ایک میچ ٹائی اور 7 بے نتیجہ رہے۔