آکسفورڈ : پاکستانی نوجوان موسیٰ ہراج آکسفورڈ یونیورسٹی یونین کے آئندہ ٹرم کے صدر منتخب ہو گئے ہیں۔ وہ اس عہدے پر منتخب ہونے والے چوتھے پاکستانی ہیں۔ موسیٰ ہراج نے سخت مقابلے کے بعد آکسفورڈ یونیورسٹی یونین کے صدر کے عہدے پر کامیابی حاصل کی۔
موسیٰ ہراج سابق وفاقی وزیر محمد رضا حیات ہراج کے صاحبزادے ہیں۔ اس کامیابی پر موسیٰ ہراج نے کہا کہ "آکسفورڈ یونیورسٹی یونین کا صدر بننا میرے لیے اعزاز کی بات ہے اور میں اللہ تعالیٰ کا شکر گزار ہوں کہ اس مقام تک پہنچا ہوں۔" واضح رہے کہ اس سے قبل بینظیر بھٹو، احمد نواز اور اسرار خان بھی آکسفورڈ یونین کے صدر کے عہدے پر فائز رہ چکے ہیں، اور موسیٰ ہراج ان کے نقش قدم پر چلتے ہوئے اس تاریخی کامیابی کا حصہ بنے ہیں۔
