لاہور : محکمہ موسمیات نے آج سے ملک بھر میں بارشوں کا نیا سلسلہ شروع ہونے کی پیشگوئی کر دی ہے۔ محکمہ موسمیات کے مطابق مغربی ہواؤں کا سلسلہ اتوار سے شمالی علاقوں میں داخل ہو گا اور یہ سلسلہ 16 مارچ تک جاری رہنے کا امکان ہے۔
موسمیات کے مطابق 9 سے 16 مارچ کے دوران اسلام آباد، راولپنڈی، چترال، مری، گلگت بلتستان اور کشمیر میں بارشوں کا امکان ہے۔ 12 سے 16 مارچ کے دوران پنجاب کے بیشتر شہروں میں بھی بارش ہو سکتی ہے، جبکہ 14 اور 15 مارچ کو بلوچستان کے علاقوں میں گرج چمک کے ساتھ بارشوں کی توقع ہے۔
اسلام آباد، لاہور، پشاور، کوئٹہ اور دیگر بڑے شہروں میں اربن فلڈنگ کا خدشہ ظاہر کیا گیا ہے۔ مزید برآں، بالائی علاقوں میں شدید برفباری کے باعث سڑکوں کے بند ہونے کا امکان بھی ہے، جس سے عوام کو سفر کرنے میں مشکلات کا سامنا ہو سکتا ہے۔ محکمہ موسمیات نے عوام کو احتیاطی تدابیر اختیار کرنے کی ہدایت کی ہے تاکہ بارشوں اور برفباری سے پیدا ہونے والی مشکلات سے بچا جا سکے۔
