کیف : یوکرینی وزارت داخلہ نے بتایا ہے کہ روسی افواج نے خارکیو ریجن اور مشرقی شہر ڈوبروپیلیا میں میزائل اور ڈرون حملے کیے، جس کے نتیجے میں 5 بچوں سمیت 14 افراد ہلاک اور 37 زخمی ہو گئے۔
وزارت داخلہ کے مطابق، روسی فورسز نے ڈوبروپیلیا میں بلیسٹک میزائل، متعدد راکٹس اور ڈرونز کے ذریعے حملے کیے، جس سے ایک 8 منزلہ عمارت اور 30 گاڑیاں تباہ ہو گئیں۔ اس حملے میں 11 افراد ہلاک ہوئے، جن میں 5 بچے بھی شامل ہیں، اور 30 دیگر زخمی ہو گئے۔ یوکرینی وزارت نے یہ بھی بتایا کہ خارکیو ریجن کے شمال مشرق میں ایک علیحدہ ڈرون حملے میں 3 شہری ہلاک اور 7 زخمی ہوئے۔
یوکرینی صدر ولادیمیر زیلنسکی نے فیس بک پر ایک بیان میں کہا کہ یہ حملے اس بات کا ثبوت ہیں کہ روسی مقاصد میں کوئی تبدیلی نہیں آئی۔ انہوں نے کہا کہ "یہ ضروری ہے کہ ہم اپنی بہترین کوششوں کو جاری رکھیں، فضائی دفاع کو مضبوط کریں اور روس کے خلاف پابندیوں میں اضافہ کریں۔" جمعہ کو روسی افواج نے یوکرین کے توانائی اور گیس کے بنیادی ڈھانچے کو نقصان پہنچانے والے میزائل حملے کیے تھے، جس سے کیف پر دباؤ بڑھ رہا ہے۔ امریکی فوجی امداد اور انٹیلی جنس میں وقفے کی وجہ سے یوکرین کے فضائی دفاع کی صلاحیت متاثر ہو سکتی ہے۔
دونوں ممالک کے درمیان مذاکرات کی کوششیں جاری ہیں، لیکن حملے تاحال جاری ہیں۔ ایک مقامی اہلکار نے بتایا کہ یوکرین کے ایک بڑے ڈرون حملے کے دوران سرگٹنیفٹیگز کی کریشی آئل ریفائنری کو بھی نقصان پہنچا۔ روسی افواج نے حالیہ ہفتوں میں کرسک سے یوکرینی فوجیوں کو نکالنے کی کوششیں تیز کر دی ہیں، اور روسی وزارت دفاع نے دعویٰ کیا ہے کہ اس کے فوجیوں نے کرسک کے علاقے میں تین دیہات یوکرینی فورسز سے واپس لے لیے ہیں۔