صوابی : جماعت اسلامی خیبرپختونخواکےسابق امیر اور سینیٹر (ر) مشتاق احمد خان کے بڑے بھائی کو صوابی میں ان کے گھر کے سامنے گولیاں مار کر قتل کردیا گیا ہے۔
پولیس کا کہنا ہے کہ شکیل احمد خان کو گھر کے سامنے گولیاں مارکر قتل کیا گیا،اور یہ واقعہ صوابی کے گاؤں احد خان کلے شیخ جانہ میں پیش آیا ہے۔ ڈی پی او صوابی محمد اظہر نے کہا ہےکہ شکیل احمد خان اپنے ہمسائے کی فائرنگ سے جاں بحق ہوئے، ملزم نے پہلے والدکا قتل کیا تاہم مقتول شکیل خان بیچ بچاؤ کے لیےگئے تھے ، اور بیچ بچاؤ کے دوران شکیل خان فائرنگ کا نشانہ بن گئے۔
ڈی پی او صوابی نے مزید کہا ہےکہ مبینہ طور پر ملزم نشےکا عادی ہے اور اس کا دماغی توازن بھی مکمل درست نہیں۔
دوسری جانب سوشل میڈیا پر جاری کردہ بیان میں سابق سینیٹر مشتاق احمد خان نے گہرے رنج و غم کا اظہار کرتے ہوئے کہا ہے کہ بڑے بھائی شکیل احمد خان کو گاؤں میں گھر کے سامنے شہید کیا گیا ، بڑےبھائی مجھے بہت عزیز تھے،وہ میرے دست وبازو تھے اور یہ بدترین درندگی ہے۔
