اسلام آباد :اسلام آباد ہائی کورٹ نے پی ٹی آئی رہنما اور وفاقی وزیر فیصل واوڈا کی نااہلی کے لئے درخواست کے قابل سماعت ہونے سے متعلق فیصلہ محفوظ کرلیا ۔ اسلام آباد ہائی کورٹ میں جسٹس عامر فاروق نے فیصل واوڈا کی نااہلی کیلئے درخواست پر سماعت کی .
درخواست گزارجہانگیر جدون نے موقف اختیار کیا کہ نااہلی کیس میں عدالت نے 29 جنوری کو فیصل واوڈا کو دو ہفتوں میں جواب جمع کرانے کا حکم دیا تھا پانچ ماہ ہوگئے مگر جواب جمع نہیں کرایاگیا۔
درخواست گزار نے کہا کہ فیصل واوڈا نے تاحال جواب داخل نہ کرا کے عدالتی حکم عدولی کی جس پر توہین عدالت کی کارروائی کی جائے،اس موقع پر جسٹس عامر فاروق نے کہا کہ عدالت اس کیس کو جلد سماعت کے لیے مقرر کرچکی ہے۔
بعد ازاں اسلام آباد ہائی کورٹ نے وفاقی وزیر فیصل واوڈا کے خلاف توہین عدالت کی کارورائی کے لئے دائر درخواست کے قابل سماعت ہونے سے متعلق فیصلہ محفوظ کیا۔واضح رہے کہ پی ٹی آئی رہنما فیصل واوڈا کے خلاف الیکشن کمیشن سے حقائق چھپانے پر نااہلی کی درخواست زیر سماعت ہے۔
