ملتان :پاکستان اور ویسٹ انڈیز کے درمیان 2 ٹیسٹ میچوں کی سیریز کے ٹکٹوں کی فروخت 10 جنوری سے شروع ہو گی۔ یہ ٹکٹ ملتان میں 11 نجی کوریئر کمپنی سینٹرز پر دستیاب ہوں گے، جبکہ فرسٹ کلاس اور جنرل انکلوژرز کے لیے داخلہ مفت ہوگا۔
پاکستان کرکٹ بورڈ (پی سی بی) نے گیلری کے ٹکٹ کی قیمت 500 روپے، وی آئی پی انکلوژرز کے ٹکٹ 150 روپے اور پریمیم انکلوژرز کے ٹکٹ 100 روپے مقرر کی ہے۔
ویسٹ انڈیز کے خلاف ٹیسٹ سیریز کے لیے پاکستان کی ٹیسٹ ٹیم کا اعلان آئندہ ہفتے متوقع ہے، جس میں کچھ تبدیلیوں کا امکان ہے۔ سیلیکشن کمیٹی کی میٹنگ عاقب جاوید کی وطن واپسی کے بعد ہوگی۔
انجری کے باعث صائم ایوب کی جگہ امام الحق کو منتخب کیے جانے کا امکان ہے، اور اسپنر ساجد خان اور فاسٹ بولر شاہین آفریدی کے انتخاب پر بھی غور کیا جا رہا ہے۔ عبداللہ شفیق کے ڈراپ ہونے کا امکان بھی ہے۔
پاکستان اور ویسٹ انڈیز کے درمیان 2 ٹیسٹ میچوں کی سیریز ملتان میں کھیلی جائے گی، جس کا پہلا میچ 17 جنوری سے اور دوسرا 25 جنوری سے شروع ہو گا۔