لاہور : پاکستان ویمن کرکٹ ٹیم کی اوپننگ بیٹر سدرہ امین کے والد کا انتقال ہو گیا ہے۔ کرکٹر نے اپنے سوشل میڈیا اکاؤنٹ کے ذریعے والد کے انتقال کی اطلاع دی اور ان کی مغفرت کے لیے دعا کرنے کی درخواست کی ہے۔
انہوں نے اپنی پوسٹ میں لکھا کہ "اللہ تعالیٰ میرے والد کی مغفرت فرمائے اور انہیں جنت الفردوس میں اعلیٰ مقام عطا فرمائے، ان شاء اللہ۔" کرکٹر نے اپنے پیغام کے ساتھ درخواست کی کہ ان کے والد کی روح کے لیے سورہ فاتحہ پڑھی جائے۔
یاد رہے کہ سدرہ امین کچھ روز قبل رشتہ ازدواج میں منسلک ہوئی تھیں، اور انہوں نے اپنی شادی کی تصاویر بھی اپنے سوشل میڈیا پر شیئر کی تھیں۔ اس غمگین موقع پر کرکٹر کے مداحوں اور ساتھیوں نے ان کے والد کے انتقال پر گہرے دکھ کا اظہار کیا ہے اور سدرہ امین کے ساتھ اظہار یکجہتی کیا ہے۔
