کولمبو: سری لنکا میں اتوار کی صبح اچانک پورے ملک میں بجلی کا بڑا بریک ڈاؤن ہوگیا، جس کا ذمہ دار ایک بندر کو ٹھہرایا گیا ہے۔
غیر ملکی میڈیا کے مطابق، بجلی کی معطلی کا آغاز صبح 11 بج کر 30 منٹ پر ہوا اور کئی گھنٹوں تک جاری رہا، جس کے باعث شہریوں کو شدید مشکلات کا سامنا کرنا پڑا۔ اسپتالوں سمیت اہم تنصیبات کو ہنگامی طور پر جنریٹرز پر منتقل کیا گیا۔
سری لنکن حکام کے مطابق بجلی کا بریک ڈاؤن کولمبو میں واقع سیلون الیکٹریسٹی بورڈ کے گرڈ اسٹیشن میں تکنیکی خرابی کی وجہ سے ہوا۔ تین گھنٹوں کی کوششوں کے بعد ملک کے بیشتر علاقوں میں بجلی بحال کر دی گئی، تاہم مکمل بحالی کے لیے انجینئرز اور دیگر عملہ تاحال کام کر رہا ہے۔
دلچسپ بات یہ ہے کہ سری لنکا کے وزیر توانائی کمارا جیاکوڈے نے بجلی کے اس بڑے تعطل کی ذمہ داری ایک بندر پر عائد کی ہے۔ ان کے مطابق، ایک بندر گرڈ اسٹیشن میں گھس آیا تھا، جس کی وجہ سے تکنیکی خرابی پیدا ہوئی اور بجلی کی ترسیل متاثر ہوئی۔ تاہم، اس دعوے کی مزید تفصیلات جاری نہیں کی گئیں۔
یہ پہلا موقع نہیں کہ سری لنکا کو بجلی کے بحران کا سامنا کرنا پڑا ہو۔ اس سے قبل 2022 میں بھی شدید معاشی بحران کے باعث تیل کی قلت کی وجہ سے ملک بھر میں طویل بریک ڈاؤن ہوا تھا۔