اسلام آباد: پاکستان نے سعودی عرب میں فلسطینی ریاست بنانے کے اسرائیلی وزیر اعظم کے بیان کو اشتعال انگیز، غیر سنجیدہ اور ناقابل قبول قرار دیتے ہوئے سخت مذمت کی ہے۔
وزیر خارجہ اسحاق ڈار نے اپنے بیان میں کہا کہ پاکستان فلسطینی عوام کے حقِ خودارادیت اور آزاد ریاست کے جائز حق کی مکمل حمایت کرتا ہے۔ انہوں نے کہا کہ فلسطینی عوام کو 1967 سے پہلے کی سرحدوں کے مطابق ایک آزاد ریاست کا حق حاصل ہے، جس کا دارالحکومت القدس الشریف ہوگا۔
اسحاق ڈار نے مزید کہا کہ پاکستان سعودی عرب کے ساتھ مکمل یکجہتی کا اظہار کرتا ہے اور سعودی عرب کے فلسطین کاز کے لیے غیر متزلزل عزم کو غلط رنگ دینا افسوسناک ہے۔
ترجمان وزارت خارجہ کے مطابق پاکستان فلسطینیوں کے حقوق کے تحفظ کے لیے عالمی برادری کے ساتھ مل کر کام کرتا رہے گا اور اسرائیلی وزیر اعظم کے اشتعال انگیز بیان کی مذمت کرتا ہے۔ پاکستان کا مطالبہ ہے کہ عالمی برادری اسرائیل کو امن عمل کو نقصان پہنچانے کی مسلسل کوششوں پر جوابدہ ٹھہرائے۔
ترجمان نے مزید بتایا کہ وزیر خارجہ اسحاق ڈار نے مصری ہم منصب بدر عبدالعاطی سے ٹیلیفونک گفتگو کی، جس میں غزہ کی صورتحال اور انسانی بحران پر تبادلہ خیال کیا گیا۔ دونوں وزرائے خارجہ نے مسئلہ فلسطین پر قریبی رابطہ برقرار رکھنے پر اتفاق کیا۔
پاکستان نے فلسطینی عوام کے حق میں اور مصر کے ساتھ مکمل یکجہتی کا بھی اظہار کیا ہے، جبکہ او آئی سی وزرائے خارجہ کونسل کے غیر معمولی اجلاس کے انعقاد کی حمایت کا اعلان کیا ہے۔