لاہور : پنجاب حکومت نے "پنجاب دھی رانی پروگرام" کے تحت 1500 اجتماعی شادیوں کا پہلا مرحلہ کامیابی سے مکمل کر لیا ہے، جبکہ دوسرے مرحلے کے لیے مزید 1500 شادیوں کے لیے درخواستوں کی وصولی کا آغاز کر دیا گیا ہے۔
پروگرام کے تحت درخواستیں آن لائن پورٹل cmp.punjab.gov.pk پر گھر بیٹھے جمع کرائی جا سکتی ہیں، یا پھر درخواستیں ڈپٹی ڈائریکٹر سوشل ویلفیئر کے ضلعی آفس میں بھی جمع کی جا سکتی ہیں۔ اس پروگرام سے متعلق معلومات کے لیے 1312 ہیلپ لائن بھی قائم کی گئی ہے۔
اجتماعی شادیوں کی تقریب میں شریک دُلہا دُلہن اور ان کے عزیز و اقارب کے لیے کھانے کا انتظام حکومت پنجاب کی طرف سے کیا جائے گا۔ علاوہ ازیں، نئے شادی شدہ جوڑوں کو اے ٹی ایم کے ذریعے ایک لاکھ روپے سلامی دی جائے گی۔ اس پروگرام کے تحت دُلہا دُلہن کو فرنیچر، کپڑے اور دیگر ضروری سامان کے تحائف بھی دیے جائیں گے۔
وزیراعلیٰ پنجاب مریم نواز نے اس پروگرام کی اہمیت پر بات کرتے ہوئے کہا کہ پنجاب کی ہر بیٹی سے محبت ہے اور گھر بسانے پر دلی خوشی ہوتی ہے۔ انہوں نے کہا کہ معاشرے کے نادار اور محروم طبقات کا احساس حکومت کی ذمہ داری ہے، اور حکومت ہر ذمہ داری کو بخوبی نبھائے گی۔ "بیٹیوں کے سر پر دست شفقت رکھنا پنجاب کی ریت ہے۔"
