اسلام آباد : ایشیائی ترقیاتی بینک (اے ڈی بی) نے رواں مالی سال کے دوران پاکستان کی معاشی شرح نمو کے ہدف کے حاصل نہ ہونے کا خدشہ ظاہر کیا ہے اور پیش گوئی کی ہے کہ پاکستان کی معاشی شرح نمو 2.5 فیصد رہ سکتی ہے۔ اس سے قبل اے ڈی بی نے پاکستان کی معاشی شرح نمو کا تخمینہ 3 فیصد لگایا تھا، جبکہ وفاقی حکومت نے 3.6 فیصد کی شرح نمو کا ہدف مقرر کر رکھا تھا۔
اے ڈی بی کی ڈویلپمنٹ آوٹ لک رپورٹ میں کہا گیا ہے کہ پاکستان کی معاشی شرح نمو میں کمی کی وجہ مختلف اقتصادی چیلنجز اور عالمی اقتصادی حالات ہو سکتے ہیں۔
رپورٹ میں مزید بتایا گیا ہے کہ اے ڈی بی نے رواں مالی سال کے لیے پاکستان میں مہنگائی کا تخمینہ کم کر دیا ہے، اور اب اوسط مہنگائی 6 فیصد رہنے کا امکان ظاہر کیا ہے۔ اس سے پہلے اے ڈی بی نے پاکستان کی مہنگائی کا تخمینہ 10 فیصد لگایا تھا، جب کہ وفاقی حکومت نے مہنگائی کا ہدف 12 فیصد رکھا تھا۔
اس کے علاوہ رپورٹ میں آئندہ مالی سال کے حوالے سے بھی پیش گوئی کی گئی ہے، جس کے مطابق پاکستان میں اوسط مہنگائی 5.8 فیصد رہنے کا امکان ہے اور معاشی شرح نمو 3 فیصد تک پہنچنے کا تخمینہ ہے۔
