اسلام آباد : اسلام آباد کی انسداد دہشتگردی عدالت (اے ٹی سی) نے پاکستان تحریک انصاف (پی ٹی آئی) کے غیر حاضر کارکنان کے وارنٹ گرفتاری جاری کر دیے ہیں۔ عدالت نے یہ فیصلہ 9 مئی کے احتجاج اور دیگر مقدمات کی سماعت کے دوران دیا۔
عدالت کے جج طاہر عباس سپرا نے پی ٹی آئی کے بانی عمران خان، شاہ محمود قریشی اور دیگر کارکنان کے خلاف کیس کی سماعت کی۔ پی ٹی آئی کے وکلا سردار محمد مصروف خان، مرتضی طوری اور دیگر نے ملزمان کی نمائندگی کی۔
عمران خان اور شاہ محمود قریشی کی عدم موجودگی کے باعث سماعت آگے نہیں بڑھ سکی اور عدالت نے پیش ہونے والے ملزمان کی حاضری کے بعد سماعت ملتوی کر دی۔ اس دوران عدالت نے پی ٹی آئی کے غیر حاضر کارکنان کے وارنٹ گرفتاری بھی جاری کیے۔
وکیل صفائی نے عدالت کو بتایا کہ عمران خان دستیاب نہیں ہیں، جس کی وجہ سے کیس آگے نہیں بڑھ رہا، اور یہ کہ کارکنان دور دراز کے علاقوں سے آتے ہیں، اس لیے انہیں حاضری سے استثنیٰ دیا جائے۔ تاہم عدالت نے ریمارکس دیے کہ سپریم کورٹ کی 9 مئی کے مقدمات کے حوالے سے ہدایات تمام کیسز پر لاگو ہیں۔
بعد ازاں، عدالت نے تینوں مقدمات کی سماعت 9 مئی تک ملتوی کر دی۔ ان مقدمات میں پی ٹی آئی کارکنان پر تھانہ شمس کالونی اور تھانہ کھنہ میں 9 مئی کے واقعات اور مارچ 2023 کے احتجاج کی بنیاد پر مقدمات درج ہیں۔