اسلام آباد :وزیراعظم محمد شہباز شریف سے امریکی وفد نے ملاقات کی، جس میں پاکستان کے معدنی شعبے میں سرمایہ کاری کے مواقع پر تفصیل سے بات چیت کی گئی۔ اس وفد کی قیادت سینئر بیورو آفیشل اور قائم مقام اسسٹنٹ سیکرٹری، بیورو آف ساؤتھ اینڈ سینٹرل ایشین افیئرز، یو ایس ڈیپارٹمنٹ آف سٹیٹ نے کی، اور یہ وفد پاکستان منرلز انویسٹمنٹ فورم میں شرکت کے لیے پاکستان کا دورہ کر رہا ہے۔
وزیراعظم نے فورم میں امریکی شرکت کا خیرمقدم کرتے ہوئے کہا کہ پاکستان کے معدنیات کے شعبے میں وسیع امکانات ہیں، اور امریکی کمپنیوں کو ان مواقع سے فائدہ اٹھانا چاہیے۔ انہوں نے دونوں ممالک کے تعلقات کی اہمیت پر زور دیتے ہوئے کہا کہ پاکستان امریکہ کے ساتھ دوطرفہ تعلقات کو مزید مستحکم کرنے کا خواہاں ہے، خاص طور پر صدر ٹرمپ اور ان کی انتظامیہ کے ساتھ تعاون بڑھانے کی خواہش کا اظہار کیا۔
وزیراعظم نے اس بات پر بھی زور دیا کہ تجارت، سرمایہ کاری اور انسداد دہشت گردی جیسے شعبوں میں دونوں ممالک کے درمیان مزید تعاون کی ضرورت ہے۔
اس موقع پر قائم مقام اسسٹنٹ سیکرٹری میئر نے پاکستان منرلز انویسٹمنٹ فورم کے کامیاب انعقاد پر وزیراعظم کو مبارکباد دی اور پاکستان کے معدنی شعبے کی وسیع استعداد کا اعتراف کرتے ہوئے امریکی کمپنیوں کی جانب سے اس شعبے میں سرمایہ کاری میں دلچسپی ظاہر کی۔ انہوں نے کہا کہ امریکہ پاکستان کے ساتھ مشترکہ دلچسپی کے امور پر کام کرنے کے لیے تیار ہے اور دوطرفہ تعلقات کو مزید فروغ دینے کا خواہاں ہے۔
اس ملاقات میں نائب وزیراعظم و وزیر خارجہ محمد اسحاق ڈار، وفاقی وزیر اقتصادی امور احد خان چیمہ، وزیر پٹرولیم علی پرویز ملک، معاون خصوصی طارق فاطمی اور دیگر اعلیٰ حکام بھی موجود تھے۔