کیلیفورنیا: دنیا میں پہلی بار ایک روبوٹ کی تیار کردہ پینٹنگ لاکھوں ڈالرز میں نیلام ہوئی ہے۔ "آئی ڈا" نامی انسان نما روبوٹ کی بنائی گئی پینٹنگ نے نیلامی کی تاریخ میں ایک نیا سنگ میل عبور کیا ہے۔ اس روبوٹ نے معروف کمپیوٹر سائنسدان ایلن تورنگ کا پورٹریٹ بنایا تھا، جس کا نام "اے آئی گاڈ" رکھا گیا۔
یہ پینٹنگ امریکی نیلام گھر میں 10 لاکھ 8 ہزار ڈالرز میں فروخت ہوئی، حالانکہ ابتدائی طور پر اس کی نیلامی قیمت ایک لاکھ 20 ہزار سے ایک لاکھ 80 ہزار ڈالرز کے درمیان متوقع کی جا رہی تھی۔
پینٹنگ 7 فٹ بڑی ہے اور اس میں ایلن تورنگ کی کمپیوٹنگ اور آرٹیفیشل انٹیلی جنس کے میدان میں خدمات کو خراج تحسین پیش کیا گیا ہے۔ روبوٹ کے اندر نصب کیمروں اور ہائیڈرولک ہاتھوں کی مدد سے یہ خود اپنی مرضی سے پینٹنگز تخلیق کرتا ہے، اور اب تک متعدد دیگر پینٹنگز بھی تیار کر چکا ہے۔
آئی ڈا کا اے آئی ماڈل اسے لوگوں سے بات چیت کرنے کی صلاحیت فراہم کرتا ہے، اور یہ روبوٹ شاعری بھی کر سکتا ہے۔
آئی ڈا کو دیکھنے میں ایک خاتون کی شکل کا روبوٹ محسوس ہوتا ہے اور اسے دنیا کے سب سے جدید روبوٹس میں شمار کیا جاتا ہے۔ اس کا نام "آڈا لوولیس" پر رکھا گیا ہے، جو دنیا کی پہلی کمپیوٹر پروگرامر سمجھی جاتی ہیں۔ اس روبوٹ کو برطانیہ کے ایڈن میلار نے 2019 میں تیار کیا تھا۔