ممبئی: بھارت کے معروف پنجابی گلوکار سدھو موسے والا کے چھوٹے بھائی کی ایک تصویر سوشل میڈیا پر تیزی سے وائرل ہو گئی ہے۔ گلوکار کے والدین، بلکور سنگھ اور چرن کور، نے اپنے بیٹے شبھدیپ موسے والا کی ایک خوبصورت ویڈیو اور تصویر سدھو کے آفیشل انسٹاگرام اکاؤنٹ پر شیئر کی۔
ویڈیو میں شبھدیپ موسے والا کو گلابی رنگ کی پگڑی پہنے ہوئے اپنے والد کی گود میں بیٹھا دکھایا گیا ہے، جبکہ والدہ بھی ان کے ساتھ موجود ہیں۔ اس ویڈیو میں سدھو موسے والا کی بچپن کی کچھ دلکش تصاویر بھی شامل کی گئی ہیں، جس نے مداحوں کو ماضی کی یادیں تازہ کر دیں۔
سوشل میڈیا پر یہ ویڈیو اور تصویر تیزی سے مقبول ہو رہی ہے، اور مداح شبھدیپ کو سدھو کا ہمشکل قرار دے رہے ہیں۔ صارفین نے شبھدیپ کی شکل و صورت پر تبصرے کرتے ہوئے کہا کہ وہ سدھو موسے والا کی "کاربن کاپی" لگتے ہیں۔
یاد رہے کہ 2022 میں سدھو موسے والا کو ان کی گاڑی پر حملہ کر کے گولیاں مار کر قتل کر دیا گیا تھا، جس کی ذمہ داری بدنام زمانہ بشنوئی گینگ نے قبول کی تھی۔
