لاہور : شدید دھند اور اسموگ کی وجہ سے پاکستان کے مختلف موٹر ویز بند کر دیے گئے ہیں، جس سے ٹریفک کی روانی متاثر ہو گئی ہے۔
موٹر وے ترجمان کے مطابق، موٹروے ایم 2 لاہور سے شیخوپورہ، موٹروے ایم 3 لاہور سے جڑانوالہ اور موٹروے ایم 4 گوجرہ سے عبدالحکیم تک دھند کے باعث بند کر دی گئی ہیں۔
اسی طرح، موٹروے ایم 3 فیض پور سے درخانہ تک بھی شدید دھند کی وجہ سے بند ہے۔اس کے علاوہ، لاہور اور ملتان سمیت پنجاب کے دیگر شہروں میں اسموگ کی شدت برقرار ہے۔
لاہور میں آج صبح پارٹیکولیٹ میٹرز کی تعداد 860 ریکارڈ کی گئی، جو کہ فضائی آلودگی کے حوالے سے انتہائی خطرناک سطح پر ہے۔ اس وقت لاہور دنیا کے آلودہ ترین شہروں میں پہلے نمبر پر ہے۔
محکمہ موسمیات اور ٹریفک پولیس نے شہریوں کو موٹر وے پر سفر کرنے سے قبل احتیاط کی ہدایت کی ہے اور کہا ہے کہ دھند اور اسموگ کی شدت میں اضافے کے باعث سفر کرنے سے گریز کریں، یا کم سے کم رفتار سے سفر کریں۔