اسلام آباد : چیف جسٹس آف پاکستان جسٹس یحییٰ آفریدی کی سربراہی میں سپریم جوڈیشل کونسل کا اجلاس آج سپریم کورٹ میں طلب کیا گیا ہے۔
اجلاس کا آغاز صبح 11 بجے ہوگا، جس میں سپریم کورٹ کے سینئر جج جسٹس منصور علی شاہ اور جسٹس منیب اختر بھی شریک ہوں گے۔
اجلاس میں سپریم جوڈیشل کونسل کے ارکان، اسلام آباد ہائی کورٹ کے چیف جسٹس عامر فاروق اور بلوچستان ہائی کورٹ کے چیف جسٹس ہاشم خان کاکڑ بھی شرکت کریں گے۔ اس اجلاس میں عدلیہ سے متعلق اہم امور پر تبادلہ خیال کیا جائے گا۔
اس کے علاوہ، جوڈیشل کمیشن کا اجلاس بھی آج طلب کیا گیا ہے جس کی صدارت چیف جسٹس یحییٰ آفریدی کریں گے۔ اس اجلاس میں سندھ ہائی کورٹ میں آئینی بینچز کی تشکیل پر غور کیا جائے گا، جو صوبے میں آئینی مقدمات کی سماعت کے لیے تشکیل دیے جائیں گے۔