ممبئی:شوبز کی دنیا میں شاید ہی کوئی ایسا ستارہ ہو جو رات و رات شہرت کی بلندیوں پر پہنچا ہو ہر کسی کو محنت سے اپنا مقام بنانا پڑتا ہے ۔اداکار امیتابھ بچن کا شمار بلا شبہ بالی ووڈ کے سب سے بڑے اداکار کے طور پر کیا جاتا ہے لیکن کیا آپ نے کبھی سوچا ہے کہ ایسے اداکار کی بھی کئی ایسی خواہشیں ہوں گی جو وہ کبھی پوری نہیں کر سکتے تھے ۔لیکن ایک وقت ایسا بھی تھا جب امیتابھ بچن کی خواہش پوری کرنے کیلئے ان سے سینئر اداکارہ ممتاز نے اپنی مرسیڈیز کار انہیں چلانے کیلئے دے دی۔فلم بندھے ہاتھ کے وقت وہ ایک چھوٹے اداکار تھے جبکہ ممتاز کئی بلاک بسٹر فلموں میں کام کر چکی تھیں لیکن اس کے باوجود انہوں نے کبھی بھی خود کو بڑا ظاہر نہیں کیا۔ فلم کی شوٹنگ کے دوران ممتاز مہنگی ترین مرسیڈیز کار میں آیا کرتی تھیں جبکہ امیتابھ ایک عام سی کار میں آتے تھے۔
ممتاز کو دیکھ کر امیتابھ بچن کے دل میں بھی مرسیڈیز کار چلانے کی خواہش پیدا ہوئی اور انہوں نے اس عزم کا اظہار فلم کے سیٹ پر اپنے دوستوں سے کیا اور کہا کہ ایک دن وہ بھی ایسی ہی بڑی کار چلائیں گے۔ جب امیتابھ اپنے دوستوں کے ساتھ یہ باتیں کر رہے تھے تو یہ ممتاز نے بھی سن لیں۔فلم کی شوٹنگ ختم ہوئی اور امیتابھ کار پارکنگ میں پہنچے تو وہ یہ دیکھ کر حیران رہ گئے کہ ان کی کار اپنی جگہ پر موجود نہیں ہے ، جب انہوں نے عملے سے اس بابت استفسار کیا تو انہیں بتایا گیا کہ ان کی کار اداکارہ ممتاز لے گئی ہیں جبکہ اپنی مرسیڈیز کار کی چابی امیتابھ کے لیے چھوڑ گئی ہیں جبکہ یہ ہدایت بھی کرکے گئی ہیں کہ جب تک امیتابھ مرسیڈیز کار اپنے پاس رکھنا چاہیں رکھ سکتے ہیں۔
