راولپنڈی: سیکیورٹی فورسز نے خیبرپختونخوا کے ضلع ٹانک میں خفیہ اطلاعات پر کارروائی کرتے ہوئے تین دہشت گردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق 8 مارچ کو دہشت گردوں کی موجودگی کی اطلاع پر آپریشن کیا گیا، جس کے دوران دہشت گردوں کے ٹھکانے کو مؤثر طریقے سے نشانہ بنایا گیا۔
آپریشن کے دوران دو طرفہ فائرنگ میں تین دہشت گرد مارے گئے، جبکہ ان کے قبضے سے اسلحہ اور گولہ بارود بھی برآمد ہوا۔ آئی ایس پی آر کے مطابق ہلاک دہشت گرد سیکیورٹی فورسز اور معصوم شہریوں کے خلاف مختلف کارروائیوں میں ملوث تھے۔
علاقے میں مزید ممکنہ دہشت گردوں کے خاتمے کے لیے کلیئرنس آپریشن جاری ہے۔ پاک فوج کے ترجمان کا کہنا ہے کہ سیکیورٹی فورسز ملک سے دہشت گردی کے خاتمے کے لیے پرعزم ہیں اور ہر قیمت پر امن و استحکام کو یقینی بنایا جائے گا۔