لاہور :سی ٹی ڈی پنجاب نے مختلف شہروں میں انٹیلی جنس بیسڈ آپریشنز کے دوران 10 دہشت گردوں کو گرفتار کر لیا ہے۔ سی ٹی ڈی کے ترجمان کے مطابق، دہشت گردی کے خطرات کے پیش نظر پنجاب بھر میں 73 انٹیلی جنس بیسڈ آپریشنز کیے گئے، جن میں کامیاب کارروائیوں کے نتیجے میں 10 دہشت گردوں کو حراست میں لیا گیا۔
ترجمان نے بتایا کہ یہ آپریشنز راولپنڈی، ٹوبہ ٹیک سنگھ، خوشاب، بہاولنگر، رحیم یار خان، راجن پور، بھکر اور جہلم میں کیے گئے۔ خوشاب اور جہلم سے ٹی ٹی پی کے دو انتہائی خطرناک دہشت گرد بارودی مواد سمیت گرفتار کیے گئے۔
حکام کے مطابق، گرفتار دہشت گردوں سے دھماکہ خیز مواد، ایک آئی ای ڈی بم، 19 ڈیٹونیٹرز، 35 فٹ حفاظتی فیوز تار، پمفلٹ، نقدی اور موبائل فون برآمد ہوئے۔ دہشت گردوں کی شناخت ریاض، شفیق، رشید، جاوید، ظہیر، ظہیر الدین، حفیظ، وزیر، آصف اور وحید کے طور پر ہوئی ہے۔
یہ کارروائیاں سی ٹی ڈی کی دہشت گردی کے خلاف موثر حکمت عملی اور پنجاب میں امن قائم رکھنے کے عزم کا واضح ثبوت ہیں۔