لاہور: ماضی کے مشہور اداکار جان ریمبو نے کہا ہے کہ جو شخص اپنی بیوی یا کسی بھی خاتون کو عزت نہیں دیتا، وہ کبھی بھی مرد نہیں کہلا سکتا۔
جان ریمبو حال ہی میں ساتھی اداکار سعود کے ساتھ ایک نجی ٹی وی کے مارننگ شو میں شریک ہوئے، جہاں انہوں نے شوبز انڈسٹری اور اپنی ذاتی زندگی کے حوالے سے کھل کر بات کی۔
پروگرام کے دوران جان ریمبو نے اپنی اہلیہ کو پہلی بار شادی کی پیشکش کرنے کا واقعہ شیئر کیا۔ اداکار نے بتایا کہ جب انہوں نے اور صاحبہ نے پہلی بار ایک ساتھ فلم کی، تو انہیں صاحبہ پسند آ گئیں۔ یہ ان کی پہلی اور صاحبہ کی تیسری فلم تھی۔
جان ریمبو نے کہا کہ صاحبہ کی پہلی دونوں فلمیں فلاپ ہو چکی تھیں، مگر ان کے ساتھ تیسری فلم کامیاب ثابت ہوئی۔ شوٹنگ کے دوران ہی انہوں نے صاحبہ کو شادی کی پیشکش کی، لیکن اداکارہ نے ابتدا میں ان سے دوری اختیار کی۔ بعد ازاں، صاحبہ بھی ان کے قریب آئیں اور دونوں نے شادی کر لی۔
جان ریمبو نے بتایا کہ صاحبہ کی واحد شرط یہ تھی کہ چاہے انہیں جھونپڑی میں رکھا جائے، مگر وہاں اے سی ہونا چاہیے۔
ایک سوال کے جواب میں جان ریمبو نے کہا کہ وہ اپنی اہلیہ سے نہیں ڈرتے، مگر ان کی عزت کرتے ہیں اور انہیں پیار دیتے ہیں۔ بدلے میں، اہلیہ بھی انہیں اتنی ہی عزت اور محبت دیتی ہیں۔
کامیاب ازدواجی زندگی کے بارے میں جان ریمبو نے کہا کہ ان کے درمیان کبھی کبھار جھگڑے ہوتے ہیں، مگر ان کا ایک اصول ہے کہ جب ایک کو غصہ آتا ہے تو دوسرا خاموش ہو جاتا ہے، اور یہی ان کی ازدواجی زندگی کی کامیابی کا راز ہے۔
انہوں نے شادی شدہ مردوں کو مشورہ دیا کہ جب بھی بیوی سے جھگڑا ہو اور وہ بات کر رہی ہوں، تو شوہر کو خاموشی سے ان کی بات سننی چاہیے، کیونکہ اس سے بیوی کو اپنی غلطی کا فوراً احساس ہوتا ہے اور پانچ منٹ بعد وہ چائے کا کپ لے کر سامنے آ جاتی ہیں۔
جان ریمبو نے کہا کہ جو شخص اپنی بیوی یا خاتون کی عزت نہیں کرتا، وہ کبھی مرد نہیں کہلا سکتا۔ عزت اور محبت بیویوں کا حق ہے، جو انہیں ضرور ملنی چاہیے۔