سرگودھا:وزیرِ اعلیٰ پنجاب مریم نواز نے کہا ہے کہ اس سال کے سکالرشپ پروگرام میں کسی طالب علم کو سفارش پر فائدہ نہیں دیا گیا۔
سرگودھا یونیورسٹی میں خطاب کرتے ہوئے مریم نواز نے کہا کہ ہونہار طلباء کے لیے سکالرشپ پروگرام کی مالیت 72 ارب روپے ہے، اور اس میں کسی بھی طالب علم سے اس کا سیاسی تعلق نہیں پوچھا گیا۔
انہوں نے مزید کہا کہ میرے لیے پنجاب کے تمام طلباء یکساں اہمیت رکھتے ہیں۔ وہ انہیں وزیرِ اعلیٰ کے طور پر نہیں، بلکہ ایک ماں کے طور پر دیکھتی ہیں۔ مریم نواز نے یہ بھی کہا کہ ان کے تین بچے ہیں، اور جنید سب سے زیادہ مقبول ہے، جس کی باتیں ہر جگہ سنی جاتی ہیں۔
مریم نواز نے کہا کہ ریاست ماں کی طرح ہوتی ہے اور اسی جذبے کے تحت ہم نے اچھے نجی تعلیمی اداروں کے طلباء کو بھی سکالرشپ فراہم کی ہیں۔
وزیرِ اعلیٰ نے اس سال 30 ہزار ای بائیکس کی فراہمی کا ذکر کیا اور کہا کہ یہ بائیکس اقساط پر دی جا رہی ہیں۔ انہوں نے اس عزم کا اظہار کیا کہ اگلے سال ایک لاکھ ای بائیکس مفت فراہم کرنے کی کوشش کریں گی۔
مریم نواز نے کہا کہ انہوں نے کسی بھی افسر کی تقرری یا تبادلہ سفارش پر نہیں کیا۔ ن لیگ کے بعض ایم این ایز ناراض ہیں کیونکہ ان کی مرضی کے مطابق تقرریاں نہیں کی جا رہی ہیں، اور کوئی بھی یہ نہیں کہہ سکتا کہ انہوں نے میرٹ سے ہٹ کر تقرریاں کی ہیں۔