لاہور:وزیر اطلاعات پنجاب عظمیٰ بخاری نے کہا ہے کہ ملک کے خلاف سازشیں کرنے والوں کو نہ تو معاف کیا جاتا ہے اور نہ ہی انہیں این آر او دیا جاتا ہے۔ اپنے ایک بیان میں انہوں نے کہا کہ ایک مخصوص جماعت اور شیطانی سوچ والے شخص نے نوجوانوں کی برین واشنگ کی، جس کا نتیجہ 9 مئی اور 26 نومبر کی ناکام بغاوتوں کی صورت میں نکلا۔ عظمیٰ بخاری نے نوجوانوں کو مخاطب کرتے ہوئے کہا کہ انہیں خود فیصلہ کرنا ہے کہ وہ اپنے روشن مستقبل کی طرف قدم بڑھانا چاہتے ہیں یا اقتدار کی ہوس کا ایندھن بننا چاہتے ہیں۔
عظمیٰ بخاری نے مزید کہا کہ جو لوگ اقتدار کی کرسی پر بیٹھ کر اپنے حکم کو حرف آخر سمجھتے تھے، آج انہیں آئین اور قانون کی باتیں کرتے ہوئے شرم آنی چاہیے۔ انہوں نے وزیراعلیٰ پنجاب کی تعریف کرتے ہوئے کہا کہ وہ قوم کے بچوں کو الیکٹرک بائیکس کے ساتھ سکالرشپ بھی دے رہے ہیں، جبکہ مریم نواز طلبہ اور والدین کی دعاؤں کی مستحق ہیں۔
صوبائی وزیر نے یہ بھی کہا کہ مریم نواز کے خلاف 2014 سے منفی مہم چلائی جا رہی ہے، مگر وہ ہر گزرتے دن کے ساتھ مقبول اور طاقتور ہوتی جا رہی ہیں۔ انہوں نے کہا کہ جو لوگ عوام کے ووٹ سے اقتدار میں آتے ہیں، وہ عوام کے مستقبل کے بارے میں فکر مند ہوتے ہیں، جبکہ جو چور دروازوں سے اقتدار حاصل کرتے ہیں، وہ قوم کے بچوں کو پٹرول بم اور غلیلیں تھماتے ہیں۔
