کیلیفورنیا : فوٹو اور ویڈیو شیئرنگ ایپلیکیشن انسٹاگرام نے صارفین کے لیے ایک نیا فیچر متعارف کرایا ہے جس کے تحت اے آئی کی مدد سے تصاویر خود بخود تیار کی جا رہی ہیں۔ رپورٹ کے مطابق، انسٹاگرام نے اس فیچر کی آزمائش شروع کر دی ہے، جس کے تحت صارفین کو اپنی فیڈ میں اے آئی کی تخلیق کردہ تصاویر نظر آ رہی ہیں۔
یہ فیچر فی الحال محدود صارفین کو دستیاب ہے، اور جب صارفین یہ تصاویر اپنی فیڈ پر شیئر کرتے ہیں، تو کیپشن میں یہ بتایا جاتا ہے کہ یہ تصاویر صرف خود صارف ہی دیکھ سکتا ہے، البتہ اگر وہ چاہے تو ان تصاویر کو دوسروں کے ساتھ بھی شیئر کر سکتا ہے۔ انسٹاگرام کا میٹا اے آئی سسٹم خود بخود صارف کے لیے مختلف پس منظر کی تصاویر تیار کر کے دکھاتا ہے، جسے وہ اپنی ٹائم لائن پر شیئر کر سکتا ہے۔
ابھی تک یہ واضح نہیں ہے کہ یہ فیچر کب تک باضابطہ طور پر تمام صارفین کے لیے دستیاب ہو گا، مگر موجودہ وقت میں محدود صارفین ہی اسے استعمال کر سکتے ہیں۔ یاد رہے کہ انسٹاگرام اور فیس بک نے پہلے بھی اے آئی کی مدد سے تصاویر تخلیق کرنے کا فیچر پیش کیا تھا۔
