واشنگٹن : امریکا کی مشرقی اور جنوبی ریاستوں میں برف کے طوفان کا سامنا ہے، اور کنساس سٹی میں برفباری کا 32 سالہ ریکارڈ ٹوٹ گیا ہے۔ ٹیکساس سے گلف کوسٹ تک درجہ حرارت منفی 10 ڈگری سینٹی گریڈ تک گر گیا ہے۔ میزوری اور کنساس میں مختلف حادثات کے نتیجے میں 6 افراد ہلاک ہوگئے ہیں۔
اس کے علاوہ، واشنگٹن، میری لینڈ، ورجینیا، ویسٹ ورجینیا، کنساس، میسوری، کینٹکی اور آرکنساس میں ہنگامی الرٹ جاری کیے گئے ہیں۔امریکی میڈیا کے مطابق، برف کے طوفان کے نتیجے میں 2 لاکھ سے زائد افراد بجلی سے محروم ہوگئے ہیں، جبکہ 2 ہزار سے زیادہ پروازیں منسوخ اور 9 ہزار پروازیں تاخیر کا شکار ہو گئیں۔
دوسری طرف، برطانیہ میں بھی شدید برفباری اور سیلاب کا خطرہ برقرار ہے۔ انگلینڈ اور ویلز میں سیلاب کی 500 وارننگز جاری کی جا چکی ہیں، اور لنکنشائر و لیسٹر شائر سیلاب سے سب سے زیادہ متاثر ہوئے ہیں۔ سیلاب کی وارننگ کے باعث یارک شائر اور نارتھ ایسٹ اسکاٹ لینڈ میں اسکول بند کر دیے گئے ہیں، اور متعدد ٹرینیں منسوخ ہو گئی ہیں، جبکہ پروازیں بھی تاخیر کا شکار ہیں۔ برطانیہ کے مختلف علاقوں میں برفباری کا سلسلہ آج بھی جاری رہنے کا امکان ہے۔
