لندن : پاکستان کرکٹ ٹیم کے اوپننگ بیٹر صائم ایوب علاج کے لیے کیپ ٹاؤن سے لندن پہنچ گئے ہیں۔ رپورٹس کے مطابق کرکٹ کوچ اظہر محمود بھی صائم ایوب کے ہمراہ ہیں۔ لندن پہنچنے پر پاکستان ہائی کمیشن کے فرسٹ سیکرٹری فہد سلیم نے ان کا استقبال کیا۔
چیئرمین پاکستان کرکٹ بورڈ (پی سی بی) محسن نقوی کی ہدایت پر انگلینڈ کے ماہرینِ اسپورٹس آرتھو ڈاکٹر آج صائم ایوب کا چیک اپ کریں گے۔ یاد رہے کہ صائم ایوب دائیں ٹخنے میں فریکچر کے باعث 6 ہفتے تک کرکٹ سے باہر ہو گئے ہیں۔ انہیں یہ چوٹ جنوبی افریقا کے خلاف دوسرے ٹیسٹ میچ کے دوران فیلڈنگ کرتے ہوئے لگی تھی۔ اس موقع پر محسن نقوی اور صدر پاکستان آصف علی زرداری نے صائم ایوب کو فون کرکے ان کی خیریت معلوم کی اور ان کے لیے نیک خواہشات کا اظہار کیا۔