اسلام آباد : پاکستان کے وزیر خارجہ اسحاق ڈار اور امریکی وزیر خارجہ مارکو روبیو کے درمیان ٹیلی فونک رابطہ ہوا جس میں دونوں رہنماؤں نے دو طرفہ تعلقات، علاقائی سلامتی، اور اقتصادی تعاون پر تبادلہ خیال کیا۔
ترجمان کے مطابق، اسحاق ڈار نے پاکستان اور امریکا کے درمیان اشتراک کو مزید مضبوط کرنے کے عزم کا اظہار کیا اور انسداد دہشت گردی میں تعاون بڑھانے پر زور دیا۔ اس کے علاوہ، دونوں رہنماؤں نے تجارت اور سرمایہ کاری کے شعبوں میں مزید تعاون کی اہمیت پر بھی بات کی۔
امریکی وزیر خارجہ مارکو روبیو نے پاکستان کے ساتھ معدنیات کے شعبے میں تعاون بڑھانے کی خواہش ظاہر کی اور کہا کہ دونوں ممالک کے درمیان معیشت اور تجارت میں تعاون، مستقبل کے تعلقات کی بنیاد ہوگا۔
اس کے علاوہ اسحاق ڈار نے 2013 سے 2018 تک دہشت گردی کے خلاف پاکستان کی کوششوں پر بات کرتے ہوئے کہا کہ اس جنگ میں پاکستان کو اقتصادی اور انسانی نقصان کا سامنا کرنا پڑا۔ امریکی وزیر خارجہ نے دہشت گردی کے خلاف جنگ میں پاکستان کی کوششوں کی تعریف کی اور اس میں مزید تعاون کی خواہش کا اظہار کیا۔
دونوں رہنماؤں نے افغانستان کی موجودہ صورتحال پر بھی تبادلہ خیال کیا اور مارکو روبیو نے افغانستان میں چھوڑے گئے امریکی فوجی سازوسامان کے مسئلے کو حل کرنے کی ضرورت پر اتفاق کیا۔
