قائد حزب اختلاف شہباز شریف نے بلوچستان میں خوفناک زلزلے سے ہونے والے نقصانات پر شدید رنج وغم اور افسوس کا اظہار کرتے ہوئے کہا ہے کہ قیمتی انسانی جانوں کے ضیاع پر بے حد دکھ اور افسوس ہے۔ جاں بحق ہونے والوں کے اہل خانہ اور متاثرہ خاندانوں سے دلی تعزیت کرتے ہیں۔
شہباز شریف کا کہنا تھا کہ ہنگامی صورتحال کا تقاضا ہے کہ وفاق بلوچستان میں بھرپور امدادی کارروائیاں کرے۔ ہیلی کاپٹرز کے ذریعے شدید زخمیوں کو ملک کے دیگر ہسپتالوں میں منتقل کیا جائے تاکہ زندگیاں بچ سکیں۔
ان کا کہنا تھا کہ وفاقی حکومت امدادی کارروائیوں میں قائدانہ کردار ادا کرے، ہنگامی امداد کے ادارے بھرپور طور پر متحرک ہوں۔ اولین ترجیح لوگوں کی زندگیاں بچانے، محفوظ مقامات پر منتقل کرنے اور شیلٹر وخوراک کی فراہمی پر دی جائے۔
قائد حزب اختلاف نے کہا کہ اس سے قبل بھی قوم زلزلے کی قیامت خیزی اور اس کے شدید نقصانات دیکھ چکی ہے، اللہ تعالی ہم پر رحم فرمائے۔ بلوچستان کے زلزلہ متاثرین سے پوری قوم بھرپور یکجہتی کا اظہار کرے، امدادی کارروائیوں میں اپنا حصہ ڈالیں۔
انہوں نے ہدایت جاری کی کہ پارٹی رہنما اور کارکنان امدادی کارروائیوں میں ہاتھ بٹائیں، اداروں کے ساتھ مل کر معاونت کریں۔
شہباز شریف کا مزید کہنا تھا کہ وفاق صوبائی حکومت کی مشاورت سے متاثرین زلزلہ کے لئے خصوصی پیکج کی تیاری پر کام شروع کرے۔ اللہ تعالی مرحومین کو جنت الفردوس میں جگہ عطا فرمائے اور لواحقین کو صبر جمیل دے۔
