اسلام آباد: حکومت پاکستان نے غیر قانونی طور پر مقیم غیر ملکیوں اور افغان سٹیزن کارڈ (ACC) ہولڈرز کو ملک چھوڑنے کے لیے 31 مارچ 2025 تک کی مہلت دے دی ہے۔ یکم اپریل 2025 سے ان کی ملک بدری کا عمل شروع کر دیا جائے گا۔
وزارت داخلہ کے مطابق غیر قانونی غیر ملکیوں کی واپسی کا پروگرام یکم نومبر 2023 سے نافذ ہے۔ حکومت نے تمام غیر قانونی غیر ملکیوں اور اے سی سی ہولڈرز کو رضاکارانہ طور پر واپسی کے لیے 31 مارچ 2025 کی ڈیڈ لائن دے دی ہے، جس کے بعد سخت کارروائی عمل میں لائی جائے گی۔
وزارت داخلہ کا مزید کہنا ہے کہ واپس جانے والوں کے لیے خوراک اور طبی سہولیات کا مناسب بندوبست کر دیا گیا ہے۔ حکام نے واضح کیا ہے کہ پاکستان میں رہنے کے خواہشمند افراد کو تمام قانونی تقاضے پورے کرنا ہوں گے۔
واضح رہے کہ اس پالیسی کے تحت گزشتہ سال نومبر سے ہزاروں غیر قانونی مقیم افراد پاکستان سے واپس جا چکے ہیں، اور حکومت کا کہنا ہے کہ مقررہ مدت کے بعد قانونی کارروائی مزید سخت کر دی جائے گی۔