اسلام آباد: ادارہ شماریات نے ہفتہ وار مہنگائی کے اعدادوشمار جاری کر دیے، جس کے مطابق گزشتہ ہفتے کے دوران مہنگائی میں 0.09 فیصد کمی ریکارڈ کی گئی، جبکہ سالانہ شرح منفی 0.87 فیصد رہی۔
رپورٹ کے مطابق ایک ہفتے میں 20 اشیائے ضروریہ کی قیمتوں میں کمی آئی، جبکہ 13 اشیا مہنگی ہوگئیں۔ سب سے زیادہ اضافہ کیلے کی قیمت میں 10 فیصد، چینی میں 3.15 فیصد اور انڈوں میں 2.52 فیصد ہوا۔ اس کے علاوہ مٹن، بیف، گڑ، گندم کا آٹا، چاول اور ایل پی جی کی قیمتوں میں بھی اضافہ دیکھا گیا۔
دوسری جانب، پیاز 5.59 فیصد، چائے 4.47 فیصد، لہسن 3.89 فیصد، ٹماٹر 3.60 فیصد، دال چنا 3.49 فیصد اور دال ماش 2.82 فیصد سستی ہوئیں۔ آلو کی قیمت میں 2.60 فیصد، دال مسور 1.50 فیصد، جبکہ ڈیزل 2 فیصد اور پیٹرول کے نرخ 0.24 فیصد تک کم ہوگئے۔
ادارہ شماریات کی رپورٹ میں بتایا گیا کہ ایک ہفتے کے دوران کیلے 18 روپے فی درجن تک مہنگے ہوئے، چینی مزید 5 روپے بڑھ کر اوسطاً 162 روپے 64 پیسے فی کلو تک پہنچ گئی، جبکہ ایل پی جی کا گھریلو سلنڈر 83 روپے 25 پیسے تک مہنگا ہوا۔
اسی طرح، انڈے فی درجن 7 روپے 23 پیسے، مٹن 6 روپے 56 پیسے، 20 کلو آٹے کا تھیلا 3 روپے 91 پیسے، اور بیف 50 پیسے تک مہنگا ہوگیا۔ تاہم، پیاز 4 روپے 95 پیسے اور ٹماٹر 2 روپے تک سستے ہوئے۔