نیویارک : پاکستان نے اقوام متحدہ کی سلامتی کونسل میں یمن کے بحران پر اپنی تشویش کا اظہار کرتے ہوئے فوری انسانی امداد کی ضرورت اور امن مذاکرات پر زور دیا۔
جمعرات کو سلامتی کونسل میں پاکستان کے مستقل مندوب منیر اکرم نے کہا کہ پاکستان یمن میں بگڑتی ہوئی صورتحال پر بہت فکر مند ہے، جہاں تنازع نے سنگین انسانی، سیاسی، اقتصادی اور ماحولیاتی بحران پیدا کر دیا ہے۔
منیر اکرم نے مزید کہا کہ یمن میں ایک کروڑ سے زائد افراد غذائی عدم تحفظ کا شکار ہیں اور اس وقت یمن کو 1.95 کروڑ افراد کے لیے فوری انسانی امداد کی ضرورت ہے۔ انہوں نے اس بات پر بھی زور دیا کہ فریقین امن معاہدوں پر مکمل عمل درآمد یقینی بنائیں تاکہ بحران کا حل نکل سکے۔
اس کے علاوہ، منیر اکرم نے غزہ میں جنگ بندی معاہدے کے مکمل عمل درآمد کی ضرورت پر بھی زور دیا اور کہا کہ جنگ بندی سے خطے میں استحکام کو فروغ ملے گا۔ انہوں نے کہا کہ غزہ میں مستقل جنگ بندی امن کی جانب ایک مثبت قدم ثابت ہو سکتی ہے۔
