اسلام آباد: وفاقی وزیر اطلاعات و نشریات عطا تارڑ نے کہا ہے کہ پاکستان تحریک انصاف (پی ٹی آئی) کے ساتھ مذاکرات مثبت سمت میں جاری ہیں اور 2025 ملک کے لیے سیاسی استحکام کا سال ثابت ہوگا۔
اسلام آباد میں میڈیا کرکٹ لیگ 2025 کی افتتاحی تقریب کے بعد میڈیا سے بات کرتے ہوئے وزیر اطلاعات نے کہا کہ پی ٹی آئی سے بات چیت کے نتائج مثبت ہیں اور یہ عمل سیاسی استحکام کی جانب اہم قدم ثابت ہو گا۔ انہوں نے مزید کہا کہ حکومت ملکی ترقی اور معاشی استحکام کے لیے عملی اقدامات کر رہی ہے اور عوام کی فلاح و بہبود اولین ترجیح ہے۔
عطا تارڑ نے 2024 کو پاکستان کے لیے خوشی کا سال قرار دیتے ہوئے کہا کہ اس سال میں ملکی معیشت میں بہتری آئی ہے اور اقتصادی اعشاریے مثبت رہے ہیں۔ ان کا کہنا تھا کہ اب پاکستان میں دنیا کے سب سے سستے انٹرنیٹ پیکیجز دستیاب ہیں اور انٹرنیٹ کی رفتار میں بھی نمایاں بہتری آئی ہے، جو ٹیکنالوجی کے شعبے میں ترقی کی نشاندہی کرتا ہے۔
وزیر اطلاعات نے کرکٹ کے میدان میں بھی پاکستان کی کامیابیوں کو سراہا۔ انہوں نے پاکستان کرکٹ بورڈ (پی سی بی) کے چیئرمین محسن نقوی کی اصلاحات اور کام کو قدر کی نگاہ سے دیکھا، اور کہا کہ پاکستان عالمی کرکٹ ایونٹس کی میزبانی کے لیے پوری صلاحیت رکھتا ہے۔ انہوں نے کہا کہ چیمپیئنز ٹرافی جیسے بڑے ایونٹس کی میزبانی کے لیے پاکستان تیار ہے۔
عطا تارڑ نے شنگھائی تعاون تنظیم (ایس سی او) کے سربراہی اجلاس کے بعد عالمی سطح پر پاکستان کی صلاحیت کو تسلیم کیا اور کہا کہ اس میزبانی سے پاکستان نے دنیا کو دکھایا کہ وہ بڑے عالمی ایونٹس کی میزبانی کر سکتا ہے۔
وزیر اطلاعات نے کہا کہ کھیلوں کے فروغ کے لیے حکومت نے کئی منصوبے شروع کیے ہیں، جن میں ’اڑان پاکستان‘ جیسے بڑے منصوبے شامل ہیں، جو ملک کی ترقی کے لیے اہم قدم ہیں۔ ان کا کہنا تھا کہ حکومت کا مقصد صرف اقتصادی ترقی نہیں بلکہ عوام کے معیار زندگی کو بہتر بنانا بھی ہے۔
عطا تارڑ نے ایک مرتبہ پھر کہا کہ پی ٹی آئی کے ساتھ مذاکرات کی کامیابی کے لیے حکومت مکمل طور پر پرعزم ہے اور 2025 کا سال پاکستان میں سیاسی استحکام اور ترقی کا سال ہوگا۔
