لاہور: لاہور الیکٹرک سپلائی کمپنی (لیسکو) نے بجلی چوروں اور ڈیفالٹرز کے خلاف بڑے پیمانے پر کریک ڈاؤن کے لیے رینجرز کی مدد طلب کر لی ہے۔
لیسکو کی جانب سے جاری نوٹیفکیشن کے مطابق، کمپنی نے اپنے ٹاپ 100 ڈیفالٹرز کے خلاف آپریشن کرنے کا فیصلہ کیا ہے۔ اس کارروائی کا آغاز اوکاڑہ سرکل سے کیا جائے گا، جہاں رینجرز لیسکو کے عملے کے ساتھ مشترکہ طور پر بجلی چوروں کے خلاف آپریشن کریں گے۔
نوٹیفکیشن میں بتایا گیا کہ اوکاڑہ سرکل کے دور دراز علاقوں اور سرحدی دیہات میں بجلی چوری کے خلاف سخت اقدامات اٹھائے جائیں گے۔ اس کے علاوہ، قصور، شیخوپورہ اور ننکانہ سرکلز میں بھی بجلی چوروں کے خلاف کارروائی کی جائے گی، جہاں ڈیفالٹرز اور بجلی کے نقصانات کی شرح زیادہ ہے۔
لیسکو کی جانب سے اس معاملے کو انتہائی حساس قرار دیا گیا ہے، اور افسران سے 2 دن کے اندر ڈیفالٹرز کی تفصیلی فہرستیں طلب کی گئی ہیں۔ کمپنی کے حکام کا کہنا ہے کہ اس آپریشن کا مقصد بجلی چوری کو روکنا اور بجلی کے نقصانات کو کم کرنا ہے، تاکہ صارفین کو بلا تعطل بجلی کی فراہمی کو یقینی بنایا جا سکے۔
لیسکو نے اس کریک ڈاؤن کو اپنے مالی خسارے کو کم کرنے اور بجلی کے نظام میں استحکام لانے کے لیے اہم قدم قرار دیا ہے۔
