اسلام آباد: وزیراعظم شہباز شریف نے کہا ہے کہ پاکستان کو غیرمعمولی موسمیاتی تباہ کاریوں کا سامنا ہے اور ملک موسمیاتی تبدیلی سے سب سے زیادہ متاثر ہونے والے ممالک میں شامل ہے۔
بین الاقوامی کانفرنس "بریتھ پاکستان" سے خطاب کرتے ہوئے وزیراعظم نے کہا کہ پاکستان کی کاربن اخراج کی شرح ایک فیصد سے بھی کم ہے، اس کے باوجود ملک شدید سیلاب، گلیشیئرز کے پگھلاؤ اور ہیٹ ویوز جیسی ماحولیاتی تباہ کاریوں سے دوچار ہے۔ انہوں نے یاد دلایا کہ دو سال قبل آنے والے تباہ کن سیلاب میں 1,700 افراد جاں بحق اور 3 کروڑ 30 لاکھ سے زیادہ متاثر ہوئے تھے۔
شہباز شریف نے کہا کہ موسمیاتی تبدیلی سے نمٹنے کے لیے مضبوط پالیسی فریم ورک بنایا گیا ہے، جن میں موسمیاتی تبدیلی پالیسی اور قومی موافقتی منصوبہ شامل ہیں، تاہم صرف فریم ورک بنانا کافی نہیں بلکہ ان پر عمل درآمد بھی ضروری ہے۔ انہوں نے "فائیو سی" اور "فائیو ای" اقدامات کا ذکر کرتے ہوئے کہا کہ یہ تبدیلی کے منصوبے "اڑان پاکستان" سے جڑے ہیں، جن کے تحت گورننس، اصلاحات اور استعداد کار میں بہتری لانے پر کام ہو رہا ہے۔
وزیراعظم نے موسمیاتی تبدیلیوں کے اثرات سے نمٹنے کے لیے مالی معاونت کی ضرورت پر زور دیتے ہوئے کہا کہ آئندہ نسلوں کے لیے ایک صاف، سرسبز، زیادہ مضبوط اور محفوظ ملک بنانا ہے، مگر یہ ہدف عالمی تعاون اور مالی معاونت کے بغیر حاصل کرنا ممکن نہیں۔
