راولپنڈی :سکیورٹی فورسز نے شمالی وزیرستان کے علاقے دتہ خیل میں خوارج کی موجودگی کی اطلاع پر انٹیلی جنس بیسڈ آپریشن کیا، جس کے دوران تین خوارج کو مار ڈالا گیا۔
آئی ایس پی آر کے مطابق، سیکیورٹی فورسز نے خوارج کے ٹھکانے کو نشانہ بنایا، جس کے بعد فائرنگ کا شدید تبادلہ ہوا اور تین خوارج ہلاک ہوگئے۔ ہلاک ہونے والے خوارج خواتین کے برقعہ میں چھپ کر فرار ہونے کی کوشش کر رہے تھے۔
آپریشن کے دوران ان کے قبضے سے اسلحہ اور گولہ بارود بھی برآمد ہوا۔ ان خوارج کے بارے میں بتایا گیا کہ وہ علاقے میں دہشت گردی کی کئی کارروائیوں میں ملوث تھے۔
پاک فوج کے ترجمان نے کہا کہ سینیٹائزیشن آپریشن کے ذریعے علاقے کو صاف کیا گیا اور سکیورٹی فورسز دہشت گردوں کے خاتمے کے لیے مکمل طور پر پرعزم ہیں۔