کراچی: وزیر بلدیات سندھ سعید غنی نے کہا ہے کہ شہر میں بڑھتے ہوئے ٹریفک جام اور حادثات کے پیش نظر سخت اقدامات ناگزیر ہوگئے ہیں۔
سپریم کونسل آف آل پاکستان ٹرانسپورٹرز کے وفد سے ملاقات میں سعید غنی نے کہا کہ سندھ حکومت نے ٹریفک کی روانی بہتر بنانے کے لیے حکمت عملی مرتب کر لی ہے اور جلد تجاوزات کے خلاف مہم کا آغاز کیا جائے گا۔
وزیر بلدیات نے وضاحت کی کہ ہیوی ٹرانسپورٹ اور بڑی بسوں کے داخلے پر پابندی شہریوں کی مشکلات کو کم کرنے کے لیے لگائی گئی ہے۔ روزانہ لاکھوں افراد ٹریفک جام کے باعث متاثر ہو رہے ہیں، جس کے حل کے لیے تمام اسٹیک ہولڈرز کو اعتماد میں لیا جائے گا۔
ٹرانسپورٹرز نے بس ٹرمینلز کی منتقلی اور بکنگ آفسز کی بندش کے احکامات پر اپنے تحفظات کا اظہار کیا، جس پر سعید غنی نے یقین دہانی کرائی کہ جائز مسائل حل کیے جائیں گے اور وزیر ٹرانسپورٹ سے مشاورت کے بعد مناسب حل نکالا جائے گا۔
