لاہور:چیئرمین پاکستان کرکٹ بورڈ (پی سی بی) محسن نقوی نے قذافی سٹیڈیم کی تزئین و آرائش کرنے والے مزدوروں کے ساتھ کھانا کھایا اور ان سے ملاقات کی۔ چیمپئنز ٹرافی کے آغاز سے قبل، اسٹیڈیم کی ریکارڈ مدت میں تکمیل کے بعد محسن نقوی نے 1500 سے زائد مزدوروں کے اعزاز میں ایک خصوصی ظہرانہ دیا اور ان کی نشستوں پر جا کر ان سے ملاقات کی۔
اس موقع پر مزدوروں نے چیئرمین پی سی بی کے ساتھ سلفیاں اور تصاویر بنوائیں۔ محسن نقوی نے اس بات کا شکریہ ادا کیا کہ مزدوروں نے دن رات محنت کر کے اسٹیڈیم کو تکمیل کے مراحل تک پہنچایا اور ان کی محنت کو سراہا۔
چیئرمین پی سی بی نے اس موقع پر مزدوروں کو سہ ملکی سیریز میں پاکستان اور نیوزی لینڈ کے درمیان ہونے والے میچز دیکھنے کی دعوت دی۔
مزدوروں نے چیئرمین سے گفتگو کرتے ہوئے کہا کہ وہ تین ماہ سے اس اسٹیڈیم میں کام کر رہے ہیں اور اب اس اسٹیڈیم کی تکمیل کے بعد دل خوش ہو گیا ہے۔
محسن نقوی کی خصوصی ہدایت پر مزدوروں کے لیے مٹن قورمہ، چکن روسٹ، بیف پلاؤ، گرم نان، کولڈ ڈرنکس، منرل واٹر اور کشمیری چائے کا اہتمام کیا گیا تھا تاکہ ان کی محنت کا صلہ دیا جا سکے۔
ظہرانے کے دوران پی سی بی کے اہم حکام، بشمول ایڈوائزر عامر میر، چیف آپریٹنگ آفیسر سمیر احمد، چیف ایگزیکٹو آفیسر پی ایس ایل سلمان نصیر، پاکستان ٹیم کے کپتان محمد رضوان، چیف فنانشل آفیسر جاوید مرتضیٰ اور ایف ڈبلیو او کے پراجیکٹ ڈائریکٹر نیسپاک سمیت دیگر اعلیٰ حکام بھی موجود تھے۔