لاہور : لاہور اور کراچی کے سٹیڈیمز آئی سی سی چیمپئنز ٹرافی کے لیے تیار ہو گئے ہیں، اور وزیر اعظم شہباز شریف آج رنگا رنگ تقریب میں قذافی سٹیڈیم کا افتتاح کریں گے۔ افتتاحی تقریب میں نامور گلوکار علی ظفر، عارف لوہار اور آئمہ بیگ اپنی گلوکاری سے محفل سجائیں گے، جبکہ آتشبازی، منفرد لائٹ شو اور شاندار ڈھول پرفارمنس کا مظاہرہ بھی کیا جائے گا۔
دوسری جانب نیشنل سٹیڈیم کراچی بھی مکمل ہو چکا ہے اور اس کا افتتاح 11 فروری کو ہوگا۔ پی سی بی کے چیئرمین محسن نقوی نے اس موقع پر کہا کہ پی سی بی نے قذافی سٹیڈیم کو 117 دنوں میں عالمی معیار کے مطابق جدید سٹیڈیم میں تبدیل کیا ہے، جس میں 32 ہزار افراد کی نشستیں دستیاب ہیں۔
چیئرمین پی سی بی کا کہنا تھا کہ ہمارے سٹیڈیمز، خصوصاً قذافی سٹیڈیم، اب بین الاقوامی معیار کے مطابق تیار ہو چکا ہے اور یہ کرکٹ کے شائقین کے لیے ایک یادگار تجربہ ثابت ہوگا۔