لاہور : فیفا نے پاکستان فٹبال فیڈریشن (پی ایف ایف) کی رکنیت ایک بار پھر معطل کر دی ہے۔ فیفا کے جاری کردہ بیان کے مطابق، پی ایف ایف اپنے آئین میں وہ ترامیم شامل کرنے میں ناکام رہا جو شفاف اور جمہوری انتخابات کو یقینی بنانے اور فیفا کے طے شدہ اصولوں کے مطابق پی ایف ایف کی نارملائزیشن کے عمل کو مکمل کرنے میں اہم کردار ادا کرتیں۔
فیفا نے کہا ہے کہ یہ معطلی اس وقت تک برقرار رہے گی جب تک پی ایف ایف کانگریس فیفا اور ایشین فٹبال کنفیڈریشن (اے ایف سی) کی جانب سے پیش کردہ آئینی ترامیم کی منظوری نہیں دیتی۔ قبل ازیں، فیفا اور اے ایف سی نے پی ایف ایف کو اپنے آئین میں ترامیم کرنے کی سفارش کی تھی، خاص طور پر انتخابی عمل سے متعلق شقوں میں تبدیلی کی ضرورت پر زور دیا تھا۔
البتہ ، پی ایف ایف کی منتخب کانگریس نے ان ترامیم کو مسترد کر دیا، جس کے نتیجے میں یہ معطلی عمل میں آئی۔ یہ پہلی بار نہیں کہ پی ایف ایف کو معطلی کا سامنا ہوا ہو، اس سے قبل اپریل 2021 میں بھی فیفا نے پی ایف ایف کو معطل کیا تھا جب اشفاق حسین گروپ نے پی ایف ایف دفاتر پر قبضہ کر لیا تھا۔ اس پابندی کا خاتمہ جون 2022 میں ہوا تھا۔
