لاہور : وزیر اعلیٰ پنجاب مریم نواز شریف کی ہدایت پر لاہور میں 10 فروری سے تین روزہ نیشنل ہارس اینڈ کیٹل شو کا آغاز ہو گا، جس میں 30 سال بعد پہلی بار 70 بین الاقوامی ٹیمیں بھی حصہ لیں گی۔
وزیراعلیٰ پنجاب 9 فروری کو ’’ہارس اینڈ کیٹل شو 2025‘‘ کا افتتاح کریں گی، جس کا عنوان ’’اتحاد، ترقی اور ثقافت کی بحالی‘‘ ہے۔ یہ شو پہلی بار 1964 میں منعقد ہوا تھا، اور آخری بار 1995 میں ہوا تھا۔ اس ایونٹ میں بین الاقوامی ٹیموں کی شرکت سے لاہور کے مختلف مقامات پر 9 سے 23 فروری تک کیٹل شو کا انعقاد ہوگا، جہاں کسانوں کو پالتو اور مفید جانوروں کی نمائش کا موقع ملے گا۔
ہارس اینڈ کیٹل شو میں نیزہ بازی، تیر اندازی، بُزکشی اور پولو کے دلچسپ مقابلے ہوں گے، جبکہ گھڑ سوار اپنی صلاحیتوں کا بھرپور مظاہرہ کریں گے۔ اس کے علاوہ ثقافتی تہوار، پھولوں کی نمائش اور آڑھائی گل کے مقابلے بھی ہوں گے۔
14 سے 16 فروری تک موسیقی کے میلے کا انعقاد کیا جائے گا، جس میں روایتی کھانے، مشروبات اور موسیقی کا لطف اٹھایا جائے گا۔ 19 فروری کو صوفی فیسٹیول بھی ہوگا جس میں صوفیوں اور بزرگوں کو خراج عقیدت پیش کیا جائے گا اور ان کی تعلیمات کو فروغ دیا جائے گا۔
18 اور 19 فروری کو پنجاب کے روایتی کبڈی کے کھیلوں کے مقابلے ہوں گے، جبکہ نایاب گاڑیوں کے شوقین افراد کے لیے 16 فروری کو کار شو کا انعقاد کیا جائے گا۔
