لاہور : آئی سی سی چیمپئنز ٹرافی 2025 کا سب سےبڑا حریفی مقابلہ 23 فروری کو دفاعی چیمپئن پاکستان اور روایتی حریف بھارت کے درمیان دبئی میں کھیلا جائے گا۔ اس میچ کا شائقین کرکٹ کو بے صبری سے انتظار ہے اور اس کے لیے جوش و جذبہ عروج پر ہے۔
آئی سی سی چیمپئنز ٹرافی، جسے منی ورلڈ کپ بھی کہا جاتا ہے، ایک انتہائی اہم ایونٹ ہے جس میں پاکستان کو ماضی میں بھارت کے خلاف واضح برتری حاصل رہی ہے۔ دبئی کے انٹرنیشنل اسٹیڈیم میں ہونے والا یہ میچ دونوں ٹیموں کا چیمپئنز ٹرافی میں چھٹا مقابلہ ہوگا۔ ماضی میں، دونوں ٹیموں کے درمیان چیمپئنز ٹرافی میں پانچ بار آمنا سامنا ہو چکا ہے، جہاں پاکستان نے تین مرتبہ فتح حاصل کی، جبکہ بھارت نے دو بار کامیابی حاصل کی۔
پاکستان اور بھارت کا چیمپئنز ٹرافی میں پہلا مقابلہ 19 ستمبر 2004 کو برمنگھم کے ایجبسٹن کرکٹ گراؤنڈ میں ہوا، جہاں انضمام الحق کی قیادت میں پاکستان نے بھارت کو 3 وکٹوں سے شکست دی۔ اس کے بعد 26 ستمبر 2009 کو سنچورین میں پاکستان نے یونس خان کی قیادت میں بھارت کو 54 رنز سے شکست دی، اور شعیب ملک کے 128 رنز نے اس فتح میں اہم کردار ادا کیا۔
آئی سی سی چیمپئنز ٹرافی 2013 میں، پاکستان اور بھارت کا تیسرا مقابلہ ایجبسٹن میں ہوا، جہاں بھارت نے پاکستان کو 8 وکٹ سے شکست دی، جب کہ 2017 میں ایک اور مقابلہ ایجبسٹن میں ہوا تھا جس میں بھارت نے پاکستان کو 124 رنز سے ہرا دیا۔ تاہم، 18 جون 2017 کو اوول میں کھیلے گئے فائنل میں پاکستان نے بھارت کو 180 رنز سے شکست دے کر نہ صرف گروپ میچ کی ناکامی کا بدلہ لیا بلکہ آئی سی سی چیمپئنز ٹرافی کا اعزاز بھی اپنے نام کیا۔
