لاہور: چیئرمین پاکستان کرکٹ بورڈ (پی سی بی) محسن نقوی چین سے واپسی کے بعد بغیر آرام کیے علی الصبح قذافی سٹیڈیم پہنچ گئے اور وہاں ہونے والی افتتاحی تقریب کے انتظامات کا تفصیلی جائزہ لیا۔
محسن نقوی نے افتتاحی تقریب کے لیے شاندار انتظامات کی ہدایت دیتے ہوئے کہا کہ ایونٹ کو نئے قذافی سٹیڈیم کے شایان شان ہونا چاہیے۔ انہوں نے اس موقع پر کہا کہ آج پاکستان کے لیے فخر کا مقام ہے، کیونکہ ریکارڈ مدت میں قذافی سٹیڈیم کی تعمیر نو کا کام مکمل ہوا، جس کا کریڈٹ پوری ٹیم کو جاتا ہے۔
چیئرمین پی سی بی نے مزید کہا کہ دنیا کے خوبصورت اور عالمی معیار کے قذافی سٹیڈیم کا مکمل ہونا ایک بڑی کامیابی ہے اور قوم سے کیا گیا وعدہ پورا ہونے پر اللہ تعالیٰ کا شکر گزار ہوں۔ محسن نقوی نے اس بات کا بھی ذکر کیا کہ شائقین کرکٹ اور کھلاڑی اس نئے سٹیڈیم میں فراہم کردہ جدید سہولتوں سے بھرپور لطف اندوز ہوں گے۔ انہوں نے اس کامیاب منصوبے کے لیے ورکرز، ایف ڈبلیو او، نیسپاک، کنٹریکٹرز اور پی سی بی کا شکریہ ادا کیا۔
آج نئے تعمیر شدہ قذافی سٹیڈیم کا باقاعدہ افتتاح کیا جائے گا۔ وزیراعظم پاکستان محمد شہباز شریف افتتاحی تقریب کا آغاز کریں گے، اور سٹیڈیم میں عوام کے لیے داخلہ مفت ہو گا۔ افتتاحی تقریب میں معروف سنگرز علی ظفر، عارف لوہار اور آئمہ بیگ اپنی پرفارمنس سے محفل سجائیں گے، جبکہ آتشبازی، لائٹس شو اور ڈھول کا شاندار مظاہرہ بھی پیش کیا جائے گا۔
