راولپنڈی: بانی پی ٹی آئی عمران خان نے عام انتخابات کے حوالے سے اڈیالہ جیل سے پیغام میں کہا کہ پاکستان اور میں آپ سے صرف 24 گھنٹے وقف کرنے کا مطالبہ کرتا ہوں، زیادہ سے زیادہ لوگوں کو ووٹ ڈالنے کی ترغیب دیں۔
سماجی رابطے کی ویب سائٹ ایکس پر عمران خان کے آفیشل اکاؤنٹ سے کی گئی پوسٹ میں کہا گیا کہ عمران خان نے جیل سے پیغام میں کہا ہے کہ میرے پاکستانیو، مجھے آپ کی حقیقی آزادی کے لیے لڑنے پر 24 سال قید کی سزا ہوئی ہے۔
ان کا کہنا تھا کہ پاکستان اور میں آپ سے صرف 24 گھنٹے وقف کرنے کا مطالبہ کرتا ہوں۔
عمران خان نے مزید کہا کہ انتخابات میں زیادہ سے زیادہ لوگوں کو ووٹ ڈالنے کی ترغیب دیں، پولنگ ایجنٹ کے فارم 45 ملنے تک پولنگ اسٹیشن پر انتظار کریں۔
سابق وزیر اعظم عمران خان نے حتمی نتائج کے اعلان تک ریٹرننگ آفیسر کے دفتر کے باہر پر امن رہنے کی اپیل بھی کی۔
ایکس پر ایک اور پوسٹ میں بانی چئیرمین عمران خان نے عام انتخابات کے حوالے سے گرفتاری سے قبل ریکارڈ شدہ پیغام میں کہا کہ کل انتخابات ہیں، میں چاہتا ہوں کہ عوام نکلے انتخابات کیلئے، جن جن کو جانتے ہیں ان سب کو نکالیں انتخابات میں حصہ لینے کیلئے۔
عمران خان کا کہنا تھا کہ انتخابات کے ذریعے عوام اپنے اور اپنے بچوں کا مستقبل بدلیں گے۔