مظفر آباد: بھارت نے غلطی سے لائن آف کنٹرول (ایل او سی) پار کرنے والی آزاد کشمیر کی دو بہنوں کو راولا کوٹ پونچھ کراسنگ پوائنٹ پر پاکستانی حکام کے حوالے کر دیا ہے۔
واقعہ کی اطلاع ملتے ہی پاکستان نے دونوں کشمیری بہنوں کی جلد از جلد واپسی کیلئے سفارتی کوششیں تیز کر دی تھیں ۔ اس سلسلے میں انڈین حکام سے رابطے کئے گئے تاکہ دونوں بہنوں کی بحفاظت واپسی یقینی بنائی جا سکے ۔
خیال رہے کہ پاکستانی دفتر خارجہ کے ترجمان زاہد حفیظ چودھری نے واقعے پر افسوس کا اظہار کرتے ہوئے کہا تھا کہ غلطی سے سرحد پار کرنے والی بہنیں آزاد کشمیر کے علاقے عباس پور کی رہائشی ہیں۔ ان کے نام ثنا اور لائبہ ہیں۔
ترجمان دفتر خارجہ نے بتایا کہ دونوں بہنوں کو بھارتی فوج نے گرفتار کرکے مقبوضہ کشمیر کی پولیس کے حوالے کر دیا تھا۔